syeda-shan-e-meraj

Kabhi Kabhi Teri Chahat Pe Ye Guman Guzra

kabhi kabhi tiri chahat pe ye guman guzra

ki jaise sar se sitaron ka saeban guzra

charagh aise jala kar bujha gaya koi

tamam diid ka aalam dhuan dhuan guzra

junun-e-shauq men sajdon ki aabru bhi gai

mujhe khabar na hui kab vo astan guzra

vo mera vahm-e-nazar tha ki tera aks-e-jamil

vo kaun tha ki jo manzar ke darmiyan guzra

bichhad ke shaam rahi tul-e-umr tak goya

thahar gaya tha jo lamha vo phir kahan guzra

mujhe to chashm-e-gurezan bhi iltifat lagi

tire sitam pe bhi isar ka guman guzra

chhupa ke so gai munh din men rahguzar-e-firaq

jo shab hui to khayalon ka karvan guzra

More Poems

Leave a Comment