yaad ki sub.h Dhal ga.i shauq ki shaam ho ga.i
aap ke intizar men umr tamam ho ga.i
pi hai jo ek buund bhi jaag paḌi hai zindagi
aisi sharab-e-jan-faza kaise haram ho ga.i
saath kisi ne chhoḌ kar toḌ diya kisi ka dil
chal to paḌa tha karvan raah men shaam ho ga.i
nikle ba-yad-e-mai-kada taron ke saath saath ham
jaam tak aa ke zindagi mah-e-tamam ho ga.i
raas na aa.i ziist ko sub.h-e-bahar ki hava
ahl-e-junun ki anjuman ḳhalvat-e-jam ho ga.i
aaj vo muskura diye aaj hamari zindagi
aag se phuul ban ga.i phuul se jaam ho ga.i
bazm se be-zaban uThe raah men guftugu na ki
kaise hamari dastan shahr men aam ho ga.i
raat ki jashn-gah par os paḌi hai niind ki
bad-e-sahar na jaane kyuun mahv-e-ḳhiram ho ga.i
sun li zaban-e-ḳhalq se ham ne ghazal ‘shamim’ ki
kaun si ḳhaas baat hai kis liye aam ho ga.i
Leave a Reply