ye ka.aba ye kashi haram dekhte hain
ki apna ḳhuda tujh men ham dekhte hain
zamane ke sab ḳhubsurat nazare
tumhari hi ankhon se ham dekhte hain
nahin kuchh bharosa hamen agle pal ka
nazar bhar ke tum ko sanam dekhte hain
tiri intizari se ukta gaya dil
tiri raah muddat se ham dekhte hain
yahi nasl-e-nau ka tariqa hai logon
alag zaviye se qalam dekhte hain
hamari ghazal ho ga.i kahkashan na
jahan tak sitaron ko ham dekhte hain
ghazal le rahi hai na.i ek karvaT
ye ‘dushyant’ ‘ghalib’ adam dekhte hai
Leave a Reply