zamane men vo mah-laqa ek hai
hazaron men vo dilruba ek hai
ḳhudavand-e-arz-o-sama ek hai
qasam hai ḳhuda ki ḳhuda ek hai
barabar hai apna vajud o adam
hamari baqa aur fana ek hai
adam ibtida hai adam intiha
miri ibtida intiha ek hai
na honge ye hadis rahega qadim
gharaz sab hain faani baqa ek hai
zara ghaur se mir.at-e-dil ko dekh
ye a.ina-e-haq-numa ek hai
jinhen kufr o ilhad kahta hai shaiḳh
faqat pher hai rasta ek hai
jahan men hain ghafil bahut se tariq
magar rah-e-sidq-o-safa ek hai
ma.al-e-suḳhan zikr hai yaar ka
kahun sau tarah mudda.a ek hai
mahal faqr ka hai aja.ib maqam
yahan masnad o boriya ek hai
kahan us ke aage kisi ka farogh
vo ḳhurshid-ru mah-laqa ek hai
fazilat mili ek ko ek par
gharaz ek se yaan siva ek hai
bachega na kavish se mizhgan ke dil
ki nashtar bahut aabla ek hai
jafakar dam-baz kazib muhil
main vaqif huun vo bevafa ek hai
hai amboh-e-ushshaq iisa ke ghar
mariz itne darushshifa ek hai
nahin bachta donon ka maara hua
tiri zulf aur azhdaha ek hai
na aana tu us zulf ke pech men
are dil vo kaali bala ek hai
hazaron shahid-e-mohabbat hain dafn
gali us ki aur karbala ek hai
har ik dard ka hai mudava vo lab
maraz saikḌon hain dava ek hai
dui ko na de dil men ghafil jagah
zaban ek hai aur ḳhuda ek hai
kahoge jo kuchh to sunoge bhi ‘rind’
hansi men to shaah o gada ek hai
Leave a Reply