aziyyaton ka naya silsila to hona tha
kuchh is liye bhi tujhe ab juda to hona tha
ki pahli baar safar aur vo bhi tanha safar
ki paash paash mira hausla to hona tha
jab ek umr hui tirgi nigalte hue
mira charagh se ab samna to hona tha
idhar udhar ke saharon ne be-sahara kiya
koi na hota jo mera ḳhuda to hona tha
tu mere saath agar aise haath na karta
main ḳhud ka ho na saka par tira to hona tha
ajiib shaḳhs hai ujlat men kaaT baiTha hai
vagarna peḌ tha aḳhir hara to hona tha
hamare beach mohabbat shadid thi ‘irshad’
hamare beach bahut fasla to hona tha
Leave a Reply