ab jo ḳhvab-e-giran se jaage hain
paanv sar par rakhe hain bhage hain
ḳhar-e-hasrat bhare hain ankhon men
paanv men ḳhvahishon ke taage hain
ḳhauf hai vasvase hain lekin shukr
azm-o-himmat jo apne aage hain
raḳht-e-ummid hai safar ki jaan
saz-o-saman to kachche dhage hain
tum se milna to ik bahana hai
ham to dar-asl ḳhud se bhage hain
laag laage nahin lagi ‘ahmad’
ham jo so.e to bhaag jaage hain
Leave a Reply