Tabiat Jab Meri Aamada-E-Tadbir Hoti Hai

Sahir Siyalkoti

tabi.at jab miri amada-e-tadbir hoti hai

karam-farma hamesha shumi-e-taqdir hoti hai

kahin rusva.iyon se ibtida hi men na Dar jaana

mohabbat rafta rafta ba.is-e-tauqir hoti hai

mujhe inkar kya hai un se ḳhud ja kar bhi milne men

dil-e-ḳhuddar kahta hai miri tahqir hoti hai

takabbur se kahin ai dil use zaa.e.a na kar dena

baḌi mushkil se paida aah men tasir hoti hai

tire ḳhat ko mulaqat-e-mukammal kyuun na main samjhun

tiri tahrir men bhi lazzat-e-taqrir hoti hai

uḌa jaata hai daman har kisi ka dhajjiyan ho kar

havas kuchh is tarah duniya men daman-gir hoti hai

tiri tasvir bhi kuchh kam nahin hai dil-farebi men

ḳhamoshi men bhi kya kya shoḳhi-e-taqrir hoti hai

vahi meri si ḳhamoshi vahi meri si hairani

tiri tasvir se paida miri tasvir hoti hai

ise kahte hain ‘sahir’ husn ki rudad bhi lekin

ghazal apni hamesha ishq ki tafsir hoti hai