Kahan Tak Waqt Ke Dariya Ko Hum Thahra Hua Dekhen

kahan tak vaqt ke dariya ko ham thahra hua dekhen

ye hasrat hai ki in ankhon se kuchh hota hua dekhen

bahut muddat hui ye aarzu karte hue ham ko

kabhi manzar kahin ham koi an-dekha hua dekhen

sukut-e-sham se pahle ki manzil sakht hoti hai

kaho logon se suraj ko na yuun Dhalta hua dekhen

havaen badban kholin lahu-asar barish ho

zamin-e-sakht tujh ko phulta-phalta hua dekhen

dhuen ke badalon men chhup gae ujle makan saare

ye chaha tha ki manzar shahr ka badla hua dekhen

hamari be-hisi pe rone vaala bhi nahin koi

chalo jaldi chalo phir shahr ko jalta hua dekhen

Leave a Comment