Nooh Narvi
kab ahl-e-ishq tumhare the is qadar gustaḳh
unhen tumhin ne kiya chheḌ chheḌ kar gustaḳh
baham ye jam.a hue ḳhuub idhar udhar gustaḳh
ki dil bhi mera hai teri bhi hai nazar gustaḳh
hamen mila bhi to ma.ashuq kis tarah ka mila
jafa pasand bad-aḳhlaq fitna-gar gustaḳh
ham apne dil se mohabbat men be-ḳhabar na rahen
ki hai bahut kisi gustaḳh ki nazar gustaḳh
kisi ne mujh ko rulaya koi hansa mujh par
jo tu hua to hua tera ghar ka ghar gustaḳh
kaha tha main ne ki dil ko saza.en aap na den
ye pesh-tar se hua aur beshtar gustaḳh
adab se kaam vo lete nahin sar-e-mahfil
yuun hi ho aur koi dusra agar gustaḳh
ham aur zikr-e-mohabbat dil aur shikva-e-gham
ḳhamoshiyon ne tumhari kiya magar gustaḳh
mujhe javab ye qabl-az-saval dene laga
ab is se hoga siva kya payambar gustaḳh
dil-o-nazar ko lihaz-o-haya se kya matlab
ye be-adab hai sarasar vo sar-ba-sar gustaḳh
kabhi kabhi jo tiri sharm-gin nigah mile
to main bana.un use chheḌ chheḌ kar gustaḳh
ye tajarbe ne bataya ye adaton se khula
vo jis qadar hai mohazzab usi qadar gustaḳh
kahin tumhen bhi Dubo de na bahr-e-ulfat men
bahut hai nuuh ka tufan-e-chashm-e-tar gustaḳh
Leave a Reply