ajiib ḳhamushi hai ghul machati rahti hai
ye asman hi sar par uThati rahti hai
kiya hai ishq to sabit-qadam bhi rahna siikh
miyan ye hijr ki aafat to aati rahti hai
ye jo hai aaj ḳharaba kabhi chaman tha kya
yahan to ek magas bhinbhinati rahti hai
Daro nahin ye koi saanp zer-e-kah nahin
hava hai aur vahi sarsarati rahti hai
mire hi vaste manzar zuhur karte hain
miri hi aankh yahan jagmagati rahti hai
hava agarche bahut tez hai magar phir bhi
main ḳhaak huun ye mire kaam aati rahti hai
ye kaisi chashm-e-taḳhayyul hai unghti bhi nahin
ajiib rang ke manzar banati rahti hai
vo ik nigah bhi neze se kam nahin ya.ani
hamare ḳhun-e-jigar men nahati rahti hai
qadam bhi ḳhaak pe karte hain kuchh na kuchh tahrir
hava ki mauj bhi us ko miTati rahti hai
Leave a Reply