suna hai ki un se mulaqat hogi
agar ho ga.i to baḌi baat hogi
nigahon se sharh-e-hikayat hogi
zaban chup rahegi magar baat hogi
mire ashk jis shab ke daman men honge
yaqinan vo taron bhari raat hogi
samajhti hai shaam o sahar jis ko duniya
tire zulf o aariz ki ḳhairat hogi
na savan hi barsa na bhadon hi barsa
bahut shor sunte the barsat hogi
mohabbat bahut be-maza hogi jis din
zaban be-niyaz-e-shikayat hogi
vahan qalb ki raushni saath degi
jahan din na hoga faqat raat hogi
‘nazir’ aao ro len gale mil ke ham tum
ḳhuda jaane phir kab mulaqat hogi
Leave a Reply