Jibrail O Iblis

jibrail

hamdam-e-dairina kaisa hai jahan-e-rang-o-bu

iblis

soz-o-saz o dard o daagh o justuju o aarzu

jibrail

har ghadi aflak par rahti hai teri guftugu

kya nahin mumkin ki tera chaak daman ho rafu

iblis

aah ai jibril tu vaqif nahin is raaz se

kar gaya sarmast mujh ko tuut kar mera subu

ab yahan meri guzar mumkin nahin mumkin nahin

kis qadar ḳhamosh hai ye alam-e-be-Kaḳh-o-ku

jis ki naumidi se ho soz-e-darun-e-kaenat

us ke haq men taqnatu achchha hai ya la-taqnatu

jibrail

kho diye inkar se tu ne maqamat-e-buland

chashm-e-yazdan men farishton ki rahi kya aabru

iblis

hai miri jurat se musht-e-ḳhak men zauq-e-numu

mere fitne jama-e-aql-o-ḳhirad ka tar-o-pu

dekhta hai tu faqat sahil se razm-e-ḳhair-o-shar

kaun tufan ke tamanche kha raha hai main ki tu

ḳhizr bhi be-dast-o-pa ilyas bhi be-dast-o-pa

mere tufan yam-ba-yam dariya-ba-dariya ju-ba-ju

gar kabhi ḳhalvat mayassar ho to puchh allah se

qissa-e-adam ko rangin kar gaya kis ka lahu

main khatakta huun dil-e-yazdan men kante ki tarah

tu faqat allah-hu allah-hu allah-hu

Leave a Comment