ye bole jo un ko kaha be-muravvat
main kya tum se bhi huun siva be-muravvat
laqab mere qatil ke kya puchhte ho
sitamgar na-ashna be-muravvat
un a.ina-ruyon men hai vo sitamgar
baḌa ḳhud-gharaz ḳhud-numa be-muravvat
tu vo kaj-ada hai jo duniya men DhunDhen
na tujh sa mile dusra be-muravvat
nahin us men rahm-o-haya kuchh vo qatil
baḌa sang-dil hai baḌa be-muravvat
tiri chashm-poshi se ankhon men dam hai
idhar dekh o bevafa be-muravvat
siva tere saare hasinon ko dekha
ḳhunuk be-namak be-maza be-muravvat
gila jaur ka sun ke bole tumhen kya
main ahl-e-muravvat huun ya be-muravvat
jafaon ka us se gila kijiye jab
tu kahta hai vo bevafa be-muravvat
chalo DhunDh lo ba-vafa aur koi
agar main huun na-ashna be-muravvat
‘qalaq’ uTh ga.i rasm-e-ulfat jahan se
hasin sab hain duniya ke kya be-muravvat
Leave a Reply