jab kabhi fasl-e-baharan ka ḳhayal aata hai
saath hi chak-e-gareban ka ḳhayal aata hai
jab bhi be-saḳhta zanjir pa jaati hai nazar
aap ki zulf-e-pareshan ka ḳhayal aata hai
yaad aa jaati hai kashti ki tabahi mujh ko
kaanp uThta huun jo tufan ka ḳhayal aata hai
abla-pa.i ki taklif ka ehsas nahin
zahmat-e-ḳhar-e-mughilan ka ḳhayal aata hai
main tire diin se mayus nahin huun lekin
apni kotahi-e-daman ka ḳhayal aata hai
mujh ko ma.alum hain sab gardish-e-dauran ke hudud
kyon mujhe gardish-e-dauran ka ḳhayal aata hai
dard na-qabil-e-darman sahi lekin ai dost
dard uThta hai to darman ka ḳhayal aata hai
mera hona bhi na hone ke barabar hai ‘sa.id’
kis ko ik be-sar-o-saman ka ḳhayal aata hai
Leave a Reply