sisak lete hain gaahe nala-o-zari nahin karte
mohabbat jin ko hoti hai adakari nahin karte
kise batla.en ham kyon us ki mahfil men nahin jaate
huzuri jin ko hasil ho vo darbari nahin karte
hunar rakhte ho suune naḳhunon ko kuchh to zinat do
kabhi kyon aa ke mere dil pe gul-kari nahin karte
miri chahat ko hans kar kah diya divangi tum ne
to phir kyon paas aa kar duur bimari nahin karte
jo dil men hai tumhare saaf vo chehre se zahir hai
chalo munh se bhi kah do ziyada hushyari nahin karte
hain kuchh sukhe hue phulon ke bichchhu in kitabon men
inhi ke ḳhauf se ham saaf almari nahin karte
ye manzar rail ki khiḌki ke bahar jo badalte hain
guzar jaate hain un ko ḳhud pe ham taari nahin karte
ḳhususan imtihan ki date bhi jab yak-ba-yak aa.e
ajab kya fail ho jaa.en jo tayyari nahin karte
Leave a Reply