is shahr ke log ajiib se hain ab sab hi tumhare asiir hue
jab jaan pe baraste the patthar us vaqt hamin dil-gir hue
kuchh log tumhari ankhon se karte hain talab hiire moti
ham sahra sahra Duub ga.e ik aan men jogi faqir hue
tum dard ki lazzat kya jaano kab tum ne chakhe hain zahr-e-subu
ham apne vajud ke shahid hain sangsar hue shamshir hue
ye pahron pahron soch-nagar raton raton be-ḳhvab lahar
phir kaise kaTega dhup-safar jab piir luTi jagir hue
ik umr guzari hai yuun hi sayon ke ta.aqub men ham ne
Tuk baiTh ga.e phir chal nikle hans bol liye dil-gir hue
kuchh shahr tumhara tang bhi tha kuchh tum bhi the kamzor zara
patthar ki nigahon ke Dar se tum apne hi ghar men asiir hue
Leave a Reply