har vaqt mire samne ik jalvagari hai
main dekh na pa.un to miri kam nazari hai
main aankh jhapakta huun to manzar nahin rahta
ai husn-e-dil-avez ajab muḳhtasri hai
sochun to yahan kuchh bhi nahin dekhne qabil
dekhun to tiri duniya baḌi rang bhari hai
dukh dard yahan aa.en to vapas nahin jaate
ye dil koi aseb-zada bara-dari hai
main dasht men aa kar bhi kahan chain se baiTha
yaan par bhi vahi ishq vahi dar-ba-dari hai
pyare mire alfaz ko to bar-e-digar dekh
ye sher nahin nauha-e-be-bal-o-pari hai
ye faiz mila ishq men daryuza-gari se
sultani mire naqsh-e-kaf-e-pa pe dhari hai
‘tahsin’ mazamin-e-ghazal aur nikalo
ye daur mohabbat ki musibat se bari hai
Leave a Reply