ye ik shajar ki jis pe na kanTa na phuul hai
saa.e men us ke baiTh ke rona fuzul hai
raton se raushni ki talab haa.e sadgi
ḳhvabon men us ki diid ki ḳhu kaisi bhuul hai
hai un ke dam-qadam hi se kuchh abru-e-zist
daman men jin ke dasht-e-tamanna ki dhuul hai
suraj ka qahr sirf barahna saron pe hai
puchho havas-parast se vo kyuun malul hai
aao hava ke haath ki talvar chuum len
ab buz-dilon ki fauj se laḌna fuzul hai
Leave a Reply