Poet
idhar bhi aa.en kabhi dhuup ke sata.e hue
shajar khaḌe hain sar-e-rah sar jhuka.e hue
kuchh aur baat karo gardish-e-jahan ke siva
na vaqi.at sunao sune-suna.e hue
zamin pe Dher kiye dopahar ke suraj ne
tamam phuul shab-e-mah ke khila.e hue
dhuan dhuan hain vo chehre bhi ab na jaane kyuun
mire liye the kabhi jin pe rang aa.e hue
kuchh aur ho ki na ho zad-e-rah manzil-e-shab
sahar ke ḳhvab to ankhon men hain saja.e hue
khuli faza se koi vasta na tha jab tak
ham apne-ap men ḳhud ko rahe chhupa.e hue
hava ki zad pe jab aa.e to bujh ga.e ‘ḳhavar’
vo sab charagh jo mere na the jala.e hue
Leave a Reply