ghuncha jo sar-e-shaḳh chaTakte hue dekha
pahlu men bahut dil ko dhaḌakte hue dekha
mehndi-rache hathon ne uThaya hi tha ghunghaT
ik shola-e-javvala lapakte hue dekha
vo tere bichhaḌne ka saman yaad jab aaya
biite hue lamhon ko sisakte hue dekha
bhula nahin ehsas tire lams ki ḳhushbu
tanha.i men anfas mahakte hue dekha
khinche hue ab tiir kaman men hai vo balak
aghosh men jis ko na humakte hue dekha
jab jab bhi charaghon ki laven ham ne baḌha.in
kya kya na havaon ko sanakte hue dekha
Leave a Reply