Saud Usmani
hisab-e-tark-ta.alluq tamam main ne kiya
shurua us ne kiya iḳhtitam main ne kiya
mujhe bhi tark-e-mohabbat pe hairaten hain rahin
jo kaam mera nahin tha vo kaam main ne kiya
vo chahta tha ki dekhe mujhe bikharte hue
so us ka jashn ba-sad-ehtimam main ne kiya
bahut dinon mire chehre pe kirchiyan si rahin
shikast-e-zat ko a.ina-fam main ne kiya
bahut dinon men mire ghar ki ḳhamoshi TuuTi
ḳhud apne-ap se ik din kalam main ne kiya
ḳhuda-e-zabt ne mausam pe qudtaren baḳhshin
ghubar-e-tund ko ahista-gam main ne kiya
is ek hijr ne milva diya visal se bhi
ki tu gaya to mohabbat ko aam main ne kiya
mizaj-e-gham ne bahar-taur mashghale DhunDe
ki dil dukha to koi kam-vam main ne kiya
chali jo sail-e-ravan par vo kaghzi kashti
to is safar ko mohabbat ke naam main ne kiya
vo aftab jo dil men dahak raha tha ‘sa.ud’
use sapurd-e-shafaq aaj shaam main ne kiya
Leave a Reply