lijiye tabani-e-alam ke saman ho ga.e
dil ke zarre uḌ ke har janib pareshan ho ga.e
dard-e-tanha.i se mar jaana to kuchh mushkil na tha
kya kahen gham se magar kuchh ahd-o-paiman ho ga.e
iltifat-e-dost ka mumkin nahin koi sila
kam hai jan-o-dil jo sarf-e-shukr-e-ehsan ho ga.e
tujh se kya len intiqam ai ḳhak-e-be-barg-o-nava
vo kahan hain mehr-o-mah tujh men jo pinhan ho ga.e
davat-e-jalva hai phir barq-e-nigah-e-naz ko
jam.a phir hasti ke ajza-e-pareshan ho ga.e
ab main samjha sina-e-sozan ke shaq hone ka raaz
aap pinhan kya hue goya numayan ho ga.e
jin ko hona hi na tha rah-e-mohabbat men ghubar
kis tarah vo ḳhaak ke putle phir insan ho ga.e
ḳhak-e-dil ke chand zarre uḌ ga.e the ek din
ban ke taare asmanon par daraḳhshan ho ga.e
kuchh ḳhayal-e-dost aaya tha ki aa pahunchi bahar
jis taraf dekha gulistan hi gulistan ho ga.e
husn ne roz-e-azal jab ruḳh se sarka.i naqab
chand jalve rang ban kar bazm-e-imkan ho ga.e
chha raha hai rang har janib bahar-e-husn ka
va hain jin ke dida-e-dil gul-badaman ho ga.e
rafta rafta arzu-e-rastagari miT ga.i
rah ke zindan men ‘jigar’ azad-e-zindan ho ga.e
Leave a Reply