Hayat Amrohvi
daman ki hava yaad na zulfon ki ghaTa yaad
ab kuchh bhi nahin soz-e-gham-e-dil ke siva yaad
sargarm-e-safar tha na raha kuchh bhi mujhe yaad
naqsh-e-kaf-e-pa yaad na manzil ka pata yaad
tum aa ga.e jab yaad to kuchh bhi na raha yaad
kab tum ne bhulaya mujhe kab tum ne kiya yaad
ab kuchh bhi nahin ek gham-e-dil ke siva yaad
phir bhi hai tiri nim-nigahi ki ada yaad
vo daur ki ab mujh ko zara bhi na raha yaad
yuun alam-e-furqat men tujhe main ne kiya yaad
mad.hosh kiya jis ne mujhe soz-e-nava se
ab tak hai vahi naghma-e-be-saz-o-sada yaad
allah re ye be-ḳhudi-e-shauq ka aalam
kuche men tire aa ke tira ghar na raha yaad
muddat hui ḳhud apni nava yaad na aa.i
ehsas ko ab tak hai magar teri sada yaad
yuun sub.h rulane ke liye kam to nahin thi
kyon sham-e-juda.i ka samay aa hi gaya yaad
kuchh tujh ko jafaon ke siva yaad nahin hai
lekin nahin kuchh mujh ko duaon ke siva yaad
Darta huun ḳhabar gardish-e-dauran ko na ho jaa.e
ai dost ye kyon aaj mujhe tu ne kiya yaad
nisyan ka ‘hayat’ is se ta.alluq nahin kuchh bhi
un ki bhi jafa yaad hai apni bhi vafa yaad
Leave a Reply