Ashu Mishra
dil ko ab hijr ke lamhat men Dar lagta hai
ghar akela ho to phir raat men Dar lagta hai
ek tasvir se rahta huun muḳhatab ghanTon
jab bhi tanha.i ke halat men Dar lagta hai
meri ankhon se mire jhuuT ayaan hote hain
is liye tujh se mulaqat men Dar lagta hai
lamha-e-qurb men lagta hai bichhaḌ ja.enge
haath jab bhi ho tire haath men Dar lagta hai
aj-kal main unhen jaldi hi badal deta huun
aj-kal dil ke makanat men Dar lagta hai
jism ki aag ko barish se hava milti hai
saath men tu ho to barsat men Dar lagta hai
Leave a Reply