Abbas Dana
bevafai us ne ki meri vafa apni jagah
khun-e-dil apni jagah rang-e-hina apni jagah
kitne chehre aae apna nuur kho kar chal diye
hai magar raushan abhi tak aaina apni jagah
zindagi ne us ko sahil se sadaen diin bahut
vaqt ka dariya magar bahta raha apni jagah
us ki mahfil se mujhe ab koi nisbat hi nahin
hai miri tanhaiyon ka silsila apni jagah
ham charaghon se karenge dosti ki baat ab
ye andheron ne kiya hai faisla apni jagah
to samundar aur meri zaat ik qatra sahi
teri rahmat har taraf meri dua apni jagah
ab to mujh ko bhi sada dete hain ‘dana’ kah ke log
zindagi rahne de apna mashvara apni jagah
Leave a Reply