Poet
jab aap se hi guzar ga.e ham
phir kis se kahen kidhar ga.e ham
kya ka.aba o dair o kya ḳharabat
tu hi tha gharaz jidhar ga.e ham
aa.e the misal-e-sho.ala sargarm
jaate hue juun sharar ga.e ham
shabnam ki tarah se us chaman se
hote hi dam-e-sahar ga.e ham
kuchh apne ta.iin kiya na ma.alum
kya aap se be-ḳhabar ga.e ham
juz hasrat-e-umr-e-rafta afsos
kuchh aa ke yahan na kar ga.e ham
shaiḳhi se guzar hue qalandar
bigḌe the par ab sanvar ga.e ham
is darja hue ḳharab-e-ulfat
ji se apne utar ga.e ham
faiz us lab-e-isvi ka ‘hatim’
bil-aks hua ki mar ga.e ham
Leave a Reply