Ahmad Fareed
parda-e-mahmil uthe to raz-e-virana khule
raz-e-virana khule tab ja ke divana khule
bar-e-haft-aflak bhi is na-tavan shane pe hai
zulf se kahna ki ahista sar-e-shana khule
qamat-e-parvana qadd-e-shama se kam hai abhi
kimiya ho le zara to qad-e-parvana khule
jab tilism-e-aina khud ho naqab-e-aina
chashm par kaise hijab-e-aina-khana khule
is qadar mai us ke paimane men aati jaegi
jis qadar bhi jis pe tah-dari-e-paimana khule
ajizi o ustuvari masti o varaftagi
kis pe ab juz-shama betabi-e-parvana khule
sab pe khulne ki hamen hi aarzu shayad na thi
ek do honge ki ham jin par faqirana khule
Leave a Reply