mehrban nazuk ridaon ki tahon men
narm bahon ki panahon men hai raqsan ye zamin
vo ik sipar ban kar
jhulasne se bacha leti hain us ko
naghma-gar saiqal fazaen
sabz resham ki qaba pahne zamin
hathon men thame nastaran nargis saman
nazuk tahon men
zindagi hai kis qadar mahfuz lekin…….
lahza lahza har parat maadum hoti ja rahi hai!
ek din jab akhiri tah ki sipar hogi shikasta
mehrban ozone ki chadar men lipti
ye zamin jab be-qaba ho jaegi to
arghavani aag mohlik ungliyon se
us ki shadabi ko apni aanch men jhulsae-gi aur
ye dhuan ban kar khalaon men udegi……!
Leave a Reply