poet

Na Zinda Na Murda Na Duniya Na Din Ka

na zinda na murda na duniya na diin ka

mujhe tu ne zalim na rakkha kahin ka

abas imtihan men lagate ho vaqfa

bharosa hai kya meri jan-e-hazin ka

mujhe ghar men gardish hai patli ki surat

ye eajaz hai chashm-e-sehr-afrin ka

purana na fitna tire ghar se uttha

naya asman hai magar is zamin ka

kabhi mere tan men kabhi us ke ghar men

yahi shaghl hai meri jan-e-hazin ka

ghazab hai miri us se takrar-e-vaada

sitam hai jo mauqaa mila ab nahin ka

suna tu ne ‘aqil’ ajab raat guzri

mohabbat ka mazkur nikla kahin ka

More Poems

Leave a Comment