dahakti ḳhvahishon men jal raha huun
kabhi qatil kabhi maqtal raha huun
mira pichha na kar ai zindagani
main rah-e-raftagan pe chal raha huun
main aisa azhdaha huun ḳhvahishon ka
ḳhud apna ḳhuun pi kar pal raha huun
raha huun vaqif-e-raz-e-haqiqat
ba-zahir be-ḳhabar pagal raha huun
rida-e-tishnagi oḌhe hue main
samundar ke kinare chal raha huun
gavahi ke liye kaafi rahega
main apna ḳhuun munh pe mal raha huun
koi bhula hua naghma huun dil ka
vafa ke ansuon men Dhal raha huun
Leave a Reply