darvaza-e-hasti se na imlak se nikla
paigham-e-vafa ḳhushbu-e-idrak se nikla
phir aaj kuredi ga.i vo ḳhak-e-nasheman
phir gauhar-e-maqsud usi ḳhaak se nikla
har baar mujhe mere muqaddar ne sada di
jab bhi koi taara dar-e-aflak se nikla
is baar to majnun ka bharam bhi nahin rakkha
yuun mera junun pairhan-e-chak se nikla
duniya ki zabanon pe rahe ḳhauf ke taale
bas haq to mire lahja-e-be-bak se nikla
mahsus hua aur bhi hisse hain usi men
ik purza-e-dil jab ḳhas-o-ḳhashak se nikla
Leave a Reply