Shahab Jafri
be-sar-o-saman kuchh apni tab.a se hain ghar men ham
shahr kahte hain jise hain us ke pas-manzar men ham
shaam Duubi paḌ rahe suraj ke dar par shab ki shab
sub.h bikhri chal paḌe ḳhud ko liye Thokar men ham
agahi tu ne hamen kin vus.aton men gum kiya
be-nishan har mulk men be-asra har ghar men ham
apne hi sahra men kho ja.enge andaza na tha
bazgasht apni liye phirte hain apne sar men ham
satven dar tak pukar aa.i ḳhudi ko be-ḳhudi
aur har dar se javab aaya nahin hain ghar men ham
teri dastak thi ki sannaTa vahi har shaam ka
rahrav-e-koh-e-nida hain ghar ke bam-o-dar men ham
char-su sahra men hai dard-e-anassahra ki guunj
kaaT kar apni zaban rakh aa.e the patthar men ham
chhan ye sahra ghuTi hain is ki chauhad men sada.en
kaaT ye parbat dabe hain is ki ḳhakistar men ham
ab hamen bhata nahin paiham sadaon ka nuzul
ab to ḳhud gunje hue hain gumbad-e-be-dar men ham
kiyan makan taaka hai dil ne raat aur din se pare
be-zaban hote chale hain qaid-e-bam-o-dar men ham
jaane is rah-rav ki nazren kaun si manzil pe hon
ek kanTa sa khaTakte hain dil-e-rahbar men ham
zahr ka pyala ho piina ya uThani ho salib
sadiyon ba.ad aa.en magar hote hain is manzar men ham
dasht-dar-dasht asman-bar-dosh chalte hain ‘shahab’
ham se banjare janm apna liye Thokar men ham
Leave a Reply