afroz-rizvi

Nigah Se Bhi Gae Arz-e-Haal Se Bhi Gae

nigah se bhi gae arz-e-hal se bhi gae

vo barhami hai ki ham bol-chal se bhi gae

vo lafz jo main tiri aarzu men likhti thi

vo naqsh to miri lauh-e-khayal se bhi gae

misal deti thi duniya bhi jis rifaqat ki

vo fasle hain ki ab is misal se bhi gae

vo tairan-e-mohabbat jinhen falak na mila

udaan bhar na sake aur Daal se bhi gae

vo harf-e-marham-e-har-zakhm yaad the ‘afroz’

ab un ke baad to ham indimal se bhi gae

More Poems

Leave a Comment