Naseem Sahar
koi to zehan ke dar par zarur dastak de
agar shu.ur na de la-shu.ur dastak de
tulu-e-sub.h ka manzar ajiib hota hai
jab asman se sada-e-tuyur dastak de
is intizar men hai mera qasr-e-be-ḳhvabi
ki koi nind-pari koi huur dastak de
fasil-e-shahr-e-tamanna ki tirgi bhi chhaTe
kabhi to us pe koi sub.h-e-nur dastak de
phir ek baar azab-e-shikastagi se guzar
phir us ke dar pe dil-e-na-subur dastak de
ana ke ḳhol se niklen to yuun bhi mumkin hai
dar-e-faqir pe dast-e-ghurur dastak de
ham aur nuur ki ḳhairat mangne jaa.en
hamare dar pe to ḳhud koh-e-tur dastak de
mujhe ghayab ka aalam ziyada raas aaya
magar kabhi kabhi shauq-e-zuhur dastak de
hudud-e-vaqt ke darvaze muntazir hain ‘nasim’
ki tu ye fasle kar ke ubuur dastak de
Leave a Reply