Rishte Ke Uljhe Dhagon Ko Dhire Dhire Khol Rahi Hai

rishte ke uljhe dhāgoñ ko dhīre dhīre khol rahī hai

biTiyā kuchh kuchh bol rahī hai puure ghar meñ Dol rahī hai

dil ke kahe se āñkhoñ ne bāzār meñ ik sāmān chunā hai

haath bechārā soch rahā hai jeb bhī ḳhud ko tol rahī hai

raat kī āñkheñ bāñch rahā huuñ kuchh kuchh to maiñ bhāñp rahā huuñ

kuchh kuchh andar soch rahī hai kuchh kuchh bāhar bol rahī hai

ek akelā kuchh bhī bole kaun shahr meñ us kī suntā

peḌ pe ek akelī bulbul jañgal meñ ras ghol rahī hai

jab bhī ḳhud ke haath jale tab baat ye sab ko yaad aatī hai

bachpan meñ jo siikh milī thī ab tak vo anmol rahī hai

Leave a Comment