bhare paḌe hue sab bagh-o-ragh the us din
gali men phuul gharon men charagh the us din
ye aur baat tire samne nahin aa.e
mire jilau men ka.i bad-dimagh the us din
uḌa liya tha kisi ne ḳhumar ankhon se
tahi sabahat-e-gul se ayagh the us din
shikasta-hal paḌa tha main apne bistar par
khule hue sabhi rang-e-faragh the us din
kahin libas badalte hue sitare the
kahin lahakte hue ḳhana-bagh the us din
hamen vo DhunD na paaya tha rat-bhar ‘sajid’
ki ham usi ki tarah be-suragh the us din
Leave a Reply