Shmashad Shad
qalb ka ehtijaj hota hai
aur kya iḳhtilaj hota hai
sab natija hai apni karni ka
ye jo duniya men aaj hota hai
ye bhi rangat badalti hai apni
laash ka bhi mizaj hota hai
mahv hote hain ishq men jo log
un se kab kam-kaj hota hai
bach ke chalta hai har koi us se
shaḳhs jo bad-mizaj hota hai
maslak-e-ishq men to kasrat se
zulm sahna rivaj hota hai
ishq kya hai tumhen ye batla duun
rog ye la-ilaj hota hai
mere mahbub pairahan men tire
rangon ka imtizaj hota hai
koi sho.aba ho aj-kal to ‘shad’
nazr-o-rishvat ka raaj hota hai
Leave a Reply