bul-havas men bhi na tha vo but bhi harja.i na tha
phir bhi ham bahrupiyon ko ḳhauf-e-rusva.i na tha
andhiyon ne sab miTa Daale nuqush-e-rah-guzar
ret ke siine pe dagh-e-abla-pa.i na tha
raat ke kaale kun.en men chhup gaya saaya mira
is se pahle to kabhi ye rang-e-tanha.i na tha
vahm ka paikar tha avezan dar-o-divar par
khiḌkiyon men chand mahv-e-jalva-ara.i na tha
sabz peḌon ke tane kaT kaT ke kyuun girne lage
ai hava main qatl-o-gharat ka tamanna.i na tha
raushni deti thi chamkile badan ki tazgi
varna main chehre ke ḳhal-o-ḳhad ka shaida.i na tha
kya tar-o-taza tha ab-e-sub.h se naḳhl-e-shafaq
bujhte suraj men to ye andaz-e-ra.ana.i na tha
ek ik kirdar tha apni adakari men gum
us tamasha-gah men koi tamasha.i na tha
mar gaya ‘siddiq’ koh-e-gham se Takkar maar kar
sar men sauda tha magar zauq-e-jabin-sa.i na tha
Leave a Reply