Jamshed Masroor
jab jaan pe lab-e-janan ki mahak ik barish manzar ho jaa.e
ham haath baḌha.en aur is men mahtab gul-e-tar ho jaa.e
kab dil ka laḌakpan ja.ega har vaqt yahi hai zid us ki
jo mange usi pal mil jaa.e jo soche vahin par ho jaa.e
ik alam-e-jan vo hota hai taḳhsis nahin jis men koi
is vaqt hamari banhon men jo aa.e vo dilbar ho jaa.e
ashob-e-mohabbat ka aansu rakhta hai talavvun fitrat men
ankhon men rahe to qatra hai Tapke to samundar ho jaa.e
jitna bhi sameTen ankhon men rahta hi nahin kuchh yaad hamen
yarab vo tilism-e-ariz-o-lab ik roz to azbar ho jaa.e
‘jamshed’ mata-e-husn jahan sab ahl-e-nazar ka hissa hai
jo chahe qalandar ho jaa.e jo chahe sikandar ho jaa.e
Leave a Reply