haan kahish-e-fuzul ka hasil bhi kuchh nahin
lekin hayat be-ḳhalish-e-dil bhi kuchh nahin
ab soch lo qadam hain ziyan-gah-e-shauq men
kahna na phir ki jazba-e-kamil bhi kuchh nahin
gahra sukut chaap ki avaz-e-bazgasht
rah men bhi kuchh na tha sar-e-manzil bhi kuchh nahin
juz hirs-e-manfa.at tah-e-dariya bhi kuchh na tha
juz vahm-e-afiyat lab-e-sahil bhi kuchh nahin
sab jazb-e-arzu ki tamazat ka khel hai
dil sard ho to garmi-e-mahfil bhi kuchh nahin
badle to ik namuna-e-e’raz-o-ehtiraz
yuun us nigah ki raah men haa.il bhi kuchh nahin
‘gauhar’ ḳhala men ghurte phirte ho ab kaho
kya sach hai bhulna use mushkil bhi kuchh nahin
Leave a Reply