ab to ashkon ki ravani men na rakkhi jaa.e
us ki tasvir hai paani men na rakkhi jaa.e
ek hi dil men Thahar jaa.en hamesha ke liye
zindagi naql-e-makani men na rakkhi jaa.e
zinda rakhna ho mohabbat men jo kirdar mira
sa.at-e-vasl kahani men na rakkhi jaa.e
yuun to milte hain sabhi log bichhaḌne ke liye
na-gahani ye javani men na rakkhi jaa.e
bhuul jaana hai to ai dost bhula de mujh ko
yaad ab yad-dahani men na rakkhi jaa.e
jab koi ek kashish khinch rahi hai ham ko
kimiya falsafa-dani men na rakkhi jaa.e
dil bhi thoḌa sa subuk-dosh-e-tamanna kar de
kuchh tabi.at bhi girani men na rakkhi jaa.e
Leave a Reply