Hamdam Kashmiri
hua hai samne ankhon ke ḳhandan abad
makan men hi hue hain ka.i makan abad
tumhari yaad men abad jism-o-jan mere
tumhare zikr se hai meri dastan abad
ujaḌ ga.i hai har ik samt mausam-e-gul men
na baghban hai salamat na gulistan abad
koi payam na koi ata pata un ka
koi bata.e kahan par hain raftagan abad
ajiib juzv hai ye mere jism ka ki yahan
kahin yaqin hai qaa.em kahin guman abad
yahi dua hai miri aur yahi tamanna hai
sada rahe meri vaadi yahan vahan abad
koi bhi faisla hoga nahin rahe jab tak
tumhari tegh salamat miri sinan abad
Leave a Reply