Fazaen KHushk Thin Ghar Ki to Bahar Kyon Nahin Dekha

P P Srivastava Rind

faza.en ḳhushk thiin ghar ki to bahar kyon nahin dekha

darichon se vo hangamon ka manzar kyon nahin dekha

zamin ke ḳhushk lab ye mausamon ka zahr piite hain

to tum ne asmanon ka samundar kyon nahin dekha

fazaon ki kasak se kuchh taqaze bhi badalte hain

havas lamhat ko tum ne kuchal kar kyon nahin dekha

suna ye hai samundar men jazire bhi numayan the

haTa kar badban tum ne Thahar kar kyon nahin dekha

jo ghar men chhoḌ aaya tha kafan oḌhe hue rishte

na jaane us ne basti ko palaT kar kyon nahin dekha

suna hai barf se bhi ungliyan logon ki jalti hain

to tum ne sard angaron ko chhu kar kyon nahin dekha

janab-e-‘rind’ tum to pujte aa.e ho patthar ko

jo darvaze pe chaspan hai vo patthar kyon nahin dekha