taare jo kabhi ashk-fishani se nikalte
ham chand uthae hue paani se nikalte
khamosh sahi markazi kirdar to ham the
phir kaise bhala teri kahani se nikalte
mohlat hi na di gardish-e-aflak ne ham ko
kya silsila-e-naql-e-makani se nikalte
ik umr lagi teri kushada-nazri men
is tangi-e-daman ko girani se nikalte
bas ek hi mausam ka tasalsul hai ye duniya
kya hijr-zada khvab-e-javani se nikalte
vo vaqt bhi guzra hai ki dekha nahin tum ne
sahraon ko dariya ki ravani se nikalte
shayad ki ‘salim’ amn ki surat nazar aati
ham log agar shola-bayani se nikalte
Leave a Reply