ya mah-o-sal ki divar gira di jaa.e
ya miri ḳhaak ḳhalaon men uḌa di jaa.e
kaise avaz harim-e-rag-e-jan tak pahunche
itni duuri se tujhe kaise sada di jaa.e
hai to phir kaun hai us oT men dekhun to sahi
darmiyan se ye miri zaat haTa di jaa.e
tere bas men hai to phir ya mujhe patthar kar de
ya miri ruuh ki ye pyaas bujha di jaa.e
chakhne paa.e na koi buund ye jalti miTTi
abr uTThe to hava tez chala di jaa.e
kuchh dinon ba.ad use dekha to dekha na gaya
jaise ik jalti hui jot bujha di jaa.e
ye lahakti hui shaḳhen ye mahakti belen
ye hara kunj yahin umr bata di jaa.e
aḳhir is jang men kuchh mera bhi hissa hai ‘bashir’
mere hisse ki mujhe kyuun na rida di jaa.e
Leave a Reply