ik nadi men saikḌon dariya ki tughyani mili
Dubne vaale ko mar jaane ki asani mili
hashiya-bardar se puchha samundar ne miyan
aaj tak ik mauj bhi tum ko na divani mili
sar-phiri pagal hava ko rokna dushvar tha
ek hi din ke liye thi us ko sultani mili
tishna-lab talab ne badal ko phir dhoka diya
phir vahi sahra vahi sahra ki virani mili
har safar se kashtiyon ka lauTna mumkin nahin
kya pata kab lahr koi dushman-e-jani mili
aage pichhe sab ko maqtal se guzarna hai ‘zafar’
kyuun samajhte hain ki ham ko hi pareshani mili
Leave a Reply