ghalat logon ki barish ho rahi hai
paani ki bajae un ki nahusat baras rahi hai
ek kutta raat aur din ke darmiyan khada ro raha hai
ghalat barish nahusat aur kutte ki avaz se
zindagi ke kisi bhi farsh par sulane vaali niind lazim hai
magar niind ko to aadmi ki ankhon ke uupar se utha liya gaya hai
yaani ab qayamat tak sirf jagna hai
aur us ke siva maidan-e-hashr ho bhi kya sakta hai
koi nahin janta ki janne se pahle kis ne kitna jaana
kis ne azal aur abad ke tul-o-arz ko jaana
ya jaane baghair hi ghalat zamin ki ghalat duniya men ghalat zindagi guzri gai
to kya vo maut thi jo kisi ko zindagi se le jaane ke liye aai ya nahin aai
magar ye jo saare manzar kisi nahusat ne dikhae
vo kis naam ki buniyad se shurua hui
ya shurua na ho ke kis naam par khatm hui
khatm hui bhi ya nahin
jhuut ne sach se kya kaha
ya sach ne jhuut se kya kaha
hamare hote hue jo bisat-e-zindagi utha di gai
vo ab kaun bichhae
hava ne kabhi koi diya raushan nahin kiya
hamare hote hue jo bisat-e-zindagi utha di gai
vo ab kaun bichhae
hava ne kabhi koi diya raushan nahin kiya
to jab ham nahin honge
phir hamare banae hoe rasta par kaun chalega
mohabbat naam deti hai naam mitati nahin
to ab mohabbat ko mohabbat se khatra lahaq hai
vahshat se kaho ki vo zara khidki khol kar dekhe
kahin duniya boliyon aur zabanon ka malba ho chuki ho aur hamen pata na chala ho
kahin malbe se dhundh dhundh ke tarah tarah ke bazar nikale aur lagae ja rahe huun
aur hamen pata na chala ho
zara edison ki ruuh se puchho
us ke bulb khvab-gah aur murda-khane men ba-yak-vaqt kyuun raushan hote hain
mohabbat jab avaz bani
to avaz se boliyan aur zabanen kab banin
kya zamin par koi jang
zamin ke bahar ladi gai
agar nahin to kya zamin par saton asman nazil hue
agar nahin to zamin par zamin nazil hui
Leave a Reply