ruḳh badalte hichkichate the ki Dar aisa bhi tha
ham hava ke saath chalte the magar aisa bhi tha
lauT aati thiin ka.i sabiq paton ki chiTThiyan
ghar badal dete the bashinde magar aisa bhi tha
vo kisi ka bhi na tha lekin tha sab ka mo’tabar
koi kya jaane ki us men ik hunar aisa bhi tha
paanv a.inda ki janib sar guzishta ki taraf
yuun bhi chalte the musafir ik safar aisa bhi tha
taulta tha ik ko ik ashya-e-masraf ki tarah
dosti thi aur andaz-e-nazar aisa bhi tha
ḳhud se ghafil ho ke jo pal bhar na ḳhud ko sochta
is bhari basti men koi be-ḳhabar aisa bhi tha
har na.i rut men badal jaati thi taḳhti naam ki
jis ko ham apna samajhte koi ghar aisa bhi tha
Leave a Reply