kya ahd-e-nau men apni pahchan dekhta huun
akasr ba-shakl-e-insan haivan dekhta huun
ḳhvabon ko, justuju ko, rakhna abhi safar men
kuchh duur chal ke rahen asan dekhta huun
raftar-e-vaqt tu ne paa.i hai kaisi ujlat
jazbon men asr-e-nau ke haijan dekhta huun
aa.i hai ḳhak-e-hasti uTh kar kahan se apni
ḳhvabon men kuchh jazire anjan dekhta huun
amn-o-aman ki baten shayad hain sirf baten
arz-e-ḳhuda pe har din ghamsan dekhta huun
jab justuju na manzil aur ḳhvab hain na arman
phir kis liye safar ka saman dekhta huun
tabdil ho ga.i hain aqdar-e-kohna yuun bhi
ye ka.enat saari hairan dekhta huun
meri nigah aḳhir hassas kyuun hai utni
main roz-o-shab badalte insan dekhta huun
deti hai jab bhi fursat kuchh gardish-e-zamana
rishton men apni baaqi pahchan dekhta huun
guzre the jis men lamha bachpan ke qahqahon men
ḳhvabon men vo haveli viran dekhta huun
Leave a Reply