apni ana ki aaj bhi taskin ham ne ki
ji bhar ke us ke husn ki tauhin ham ne ki
lahje ki tez dhaar se zaḳhmi kiya use
paivast dil men lafz ki sangin ham ne ki
laa.e ba-ru-e-kar na husn o jamal ko
mauqa.a tha phir bhi raat na rangin ham ne ki
ji bhar ke dil ki maut pe rone diya use
pursa diya na sabr ki talqin ham ne ki
dariya ki sair karne akele chale ga.e
sham-e-shafaq ki aap hi tahsin ham ne ki
Leave a Reply